Wednesday, November 07, 2007

!! شهادة .. البنت نوسه

لأسباب خاصة ترتبط بحب النميمة والرغبة فى التعرف على بعض الخلفية الثقافية والاجتماعية لطلاب جامعاتنا، واجهتنى شهادة طالبة جامعية تنتشر وقائعها بين الآلاف فى أرجاء مصر، إنها شهادة البنت نوسه.
- لو سمحت يا دكتور، ممكن أتكلم مع حضرتك.

- أهلا بك فى مكتبى، اتفضلى اجلسى، أهلا يا بنتى .

- أهلا بك يا دكتور، أنا نوسه ، أنا سعيدة أنى بكلم حضرتك.

- أهلا بك يا نوسه، وأنا أسعد بالتعرف على نوسه الجميلة؟

- أنا نوسه ، طالبة فى الكلية عند حضرتك، بابا أشتغل سنوات كثيرة فى دول الخليج وهو لسه قاعد هناك، وماما ربة بيت قاعدة معانا هنا فى مصر، أنا أتولدت هناك، وإحنا ثلاث بنات ولنا أخ واحد، حاليا إحنا ساكنين فى أحسن منطقة فى مدينة المنصورة، ساكنين فى شقه فخمة فى عمارة كبيرة تطل على النيل.

- ايه رأيك فى بلاد الغربة يا نوسة.

- عشنا هناك عيشه حلوة يا دكتور، الناس هناك ماشيين على شرع ربنا.

- رجعتوا من السفر إمتى يا نوسه.

- الحمد لله ربنا سترها معانا، لما قربنا من شهادة الثانوية العامة، بابا رجعنا من الغربة علشان نتعلم فى الجامعة فى مصر، قلنا نرجع بلدنا اللى إحنا بنحبها وكفاية غربة، صحيح كثير من المصريين غلابة ومتخلفين وجعانين وعطشانين، وكثير من الشباب فى مصر مش متربيين، لكن مصر بلدنا وإحنا بنحبها.

- على فكره يا نوسه إنتى ملابسك شيك قوى، الظاهر عليك انك مخطوبة.

- الحمد لله ربنا سترها معانا، أنا مخطوبة لواحد من معارف بابا، خطيبى والده بيشتغل فى الإمارات، لكن أمه وأخواته البنات عايشين هنا فى مصر، خطيبى سافر للسعودية وإنشاء الله أسافر معاه بعد الجواز.

- يعنى ممكن تسافرى قبل انتهاء الدراسة من الجامعة.

- الحمد لله ربنا سترها معانا، أنا رأيى انه مفيش سفر قبل البكالوريوس، علشان البكالوريوس شهادة جامعية ممكن أشتغل بيها فى السعودية ويكون دخلنا أحسن، وعلى كل حال أمر السفر راجع لرأى والدى ولخطيبى.

- قولى لى يا نوسه، إنتى ناويه تدرسى إيه من مواد التخصص فى الكلية.

- الحمد لله ربنا سترها معانا، أنا ادرس أى حاجه يا دكتور، كلها دراسة محصله بعضها، أنا عاوزه شهادة بكالوريوس من الجامعة والسلام، المهم أنى لا أدرس علم التأمين.

- إيه السبب يا نوسه.

- يا دكتورالتأمين حرام، بابا بيقول إن التأمين حرام، كيف نحسب على الناس أرزاقهم؟، يا دكتور عمليات التأمين فيها حساب لأرزاق الناس.

- إنتى إيه رأيك فى الكلام ده؟.

- الحمد لله ربنا سترها معانا، أنا موافقة على رأى بابا أن عمليات التأمين ودراسة التأمين حرام، إحنا إزاى نحسب عمر الإنسان ونحسب له المصائب اللى بتحط عليه، دى مقادير كلها قسمة ونصيب من عند ربنا، ولا يجب أن نتدخل فى قدرة ربنا.

- يا بنتى التأمين علم، والعلم مطلوب علشان الناس يفهموا الدنيا.

- يا دكتور، التأمين يتعارض مع الدين.

- لو سمحتى يا نوسه، ممكن أقول حاجة.

- اتفضل يا دكتور، أنا نفسى أسمع رأى حضرتك.

- يا نوسة انت لا جميلة ولا حاجة، أنت جهاز عديم الشخصية يعدونه لإنتاج أطفال متخلفين، أبوك عبد فلوس مسعور، وأمك لا تعرف معنى الأسرة، وأهلك نوع من البشر يفكرون بعقول متحجرة ويعيشون مشردين من غير وطن.

Post a Comment